• :
  • :
களத்தில்

மல்லாகத்தில் பொலிஸாரின் துப்பாக்கிச் சூட்டில் பாக்கியராசா சுதர்சன் கொல்லப்பட்டநிலையில் மக்கள் வீதியை மறித்து போராட்டம்!

மல்லாகத்தில் பொலிஸாரின் துப்பாக்கிச் சூட்டில் பாக்கியராசா சுதர்சன் கொல்லப்பட்டநிலையில் மக்கள் வீதியை மறித்து போராட்டம்!

மல்லாகத்தில் பொலிஸாரின் துப்பாக்கிச் சூட்டில் பாக்கியராசா சுதர்சன் கொல்லப்பட்டநிலையில் மக்கள் வீதியை மறித்து போராட்டம்!

 
மல்லாகத்தில் பொலிஸாரின் துப்பாக்கிச் சூட்டில் இளைஞன் ஒருவர் கொல்லப்பட்டநிலையில் மல்லாகம் சகாய மாதா ஆலயத்தில் பெருநாளில் கலந்துகொண்ட மக்கள் வீதியை மறித்து போராட்டத்தில் ஈடுபட்டுள்ளனர்.
 
இதனால் யாழ்ப்பாணம் கே.கே.எஸ் வீதியில் மல்லாகம் சகாய மாதா கோவிலடியில் வீதி போக்குவரத்து தடைப்பட்டதுடன் பதற்றமான சூழல் ஏற்பட்டுள்ளது.
 
இதனையடுத்து அப் பகுதியெங்கும் விசேட அதிரடிப்படையினரும்  பொலிஸாரும் குவிக்கப்பட்டுள்ளனர். இளைஞர்களும் பலர் சகாஜமாத ஆலய வளவினுள் குவிந்துள்ளதாக அங்கிருந்து கிடைக்கும் தகவல்கள் தெரிவித்துள்ளன.
 
சம்பவ இடத்தில் இரு குழுக்களுக்கிடைய மோதல் இடம்பெற்றதாக பொலிஸார் தெரிவிக்கும் நிலையில் அதனை பொது மக்கள் மறுக்கின்றனர். மல்லாகம் சகாஜமாதா தேவாலய பெருநாளில் பங்கேற்ற இளைஞர்கள் மீதே துப்பாக்கிச் சூடு நடத்தப்பட்டதாக பொது மக்கள் தெரிவிக்கின்றனர்.
 
இதேவேளை யாழ்ப்பாணம் கே.கே.எஸ் வீதி மல்லாகம் சகாயமாத மாதா கோவிலடியில் இன்றிரவு இடம்பெற்ற இச் சம்பவத்தில் மல்லாகம் குழமங்காடு பகுதியைச் சேர்ந்த பாக்கியராசா சுதர்சன் (வயது 32) என்ற இளைஞனே நெஞ்சில் குண்டு பாய்ந்து உயிரிழந்ததாக மல்லாகம் அரச வைத்தியசாலை தகவல்கள் உறுதிப்படுத்தியுள்ளன.
 
யாழ்ப்பாணம் மல்லாகம் பகுதியில் இலங்கை காவல்துறை நடத்திய துப்பாக்கிச்சூட்டில் பொதுமகன் ஒருவர் உயிரிழந்துள்ளார்.இரு குழுக்களுக்கிடையே நடைபெற்ற வாள்வெட்டு மோதலில் தலையிட்ட சுன்னாகம் காவல்துறை  நிலமையை கட்டுப்பாட்டினுள் கொண்டுவர துப்பாக்கிச்சூட்டை நடத்தியுள்ளதாக ஆரம்ப தகவல்கள் தெரிவிக்கின்றன.
இத்துப்பாக்கி சூட்டினிலேயே பொதுமகன் ஒருவர் உயிரிழந்ததாக சொல்லப்படுகின்றது.
 
அண்மைக்காலமாக குடாநாட்டில் வாள்வெட்டு சம்பவங்கள் பல தலைதூக்கியுள்ளதுடன் காவல்துறை மீது தொடர்ச்சியாக குற்றச்சாட்டுக்கள் எழுப்பப்பட்டும் வருகின்றது.
 
சட்டமொழுங்கை பேணாது குற்றச்செயல்களுடன் தொடர்புடைய தரப்புக்களுடன் காவல்துறை நெருங்கிய உறவை பேணுவதாகவும் குற்றஞ்சாட்டப்பட்டும் வருகின்றது. இந்நிலையில் இலங்கை காவல்துறை மீதும் தாக்குதல்கள் நடத்தப்பட்டுமுள்ளமை குறிப்பிடத்தக்கது.
 
மல்லாகம் நீதிமன்ற நீதிவான் அ.ஜூட்சன் சம்பவ இடத்துக்குச் சென்று விசாரணைகளை மேற்கொண்டார். அங்கு போராட்டம் நடத்திய மக்களுடனும் கலந்துரையாடினார். அங்கு சற்றுப் பதற்றம் குறைவடைந்தது.
 
மல்லாகம் சகாய மாதா ஆலயத்தி பெருநாள் நடைபெற்றுக் கொண்டிருந்தது. அப்போது அங்கு வந்த ஒருவர் குழப்பத்தை ஏற்படுத்தினார். ஆலயத்துக்கு வந்த இளைஞர் ஒருவர் அவரை அங்கிருந்து அகற்றி குழப்பத்தைத் தடுக்க முனைந்தார். அப்போது பொலிஸார் துப்பாக்கிச் சூடு நடத்தினர். குழப்பத்தைத் தடுக்க முயன்ற இளைஞர் துப்பாக்கிச் சூட்டில் உயிரிழந்தார் என்று ஆரம்ப விசாரணைகளின்போது சம்பவத்தை நேரில் கண்டவர்கள் தெரிவித்தனர்.
 
ஆலயத்தில் குழப்ப நிலைமை ஒன்று ஏற்பட்டது உண்மைதான். இளைஞர் ஒருவர் கையில் கம்பியுடன் வந்தார். அவரை நான்கு இளைஞர்கள் அங்கிருந்து அப்புறப்படுத்த முயன்றனர். அப்போது அங்கு வந்த அவரது உறவினர் (உயிரிழந்தவர்) கம்பியுடன் வந்தவரை சமாதானப்படுத்தி அங்கிருந்து பாதுகாப்பாக அகற்ற முயன்றார். அப்போது வாய்த்தர்க்கம் ஏற்பட்டது. இது நடந்து கொண்டிருந்தபோது திடீரெனப் பொலிஸார் வந்தனர். துப்பாக்கிச் சூட்டுச் சத்தம் கேட்டது. மோதலைத் தவிர்க்க வந்த இளைஞர் நெஞ்சில் குண்டடி பட்டு நிலத்தில் கிடந்து சத்தமிட்டார். சிறிது நேரத்துக்குப் பின்னர் அவரை மருத்துவமனைக்குக் கொண்டு சென்றனர். ஆனால் அவர் இறந்துவிட்டார்” என்று சம்பவத்தின் போது நின்றவர்கள் கூறுகின்றனர்.
 
அதேவேளை, சில நாள்களாக மல்லாகத்தில் இரு தரப்பினரிடையே முரண்பாட்டு நிலைமை காணப்பட்டது என்று அந்தப் பகுதியைச் சேர்ந்தவர்கள் கூறுகின்றனர்.
 
சம்பவம் நடைபெற்றபோது அந்தப் பகுதியில் இருந்த மோட்டார் சைக்கிள் ஒன்றும் சேதமாக்கப்பட்டுள்ளது என்று கூறப்படுகின்றது. அங்கு குழு மோதல் நடந்தமை தொடர்பில் முரண்பட்ட தகவல்களே தெரிவிக்கப்படுகின்றன. பலர் ஒருவரைத் துரத்தி வந்தனர் என்ற தகவல்களும் தெரிவிக்கப்படுகின்றன. துரத்தப்பட்டு வந்தவர் ஆலயத்துக்குள் சென்று மறைந்துவிட்டார் என்று கூறப்படுகின்றது. எனினும் துரப்பட்டு வந்தவர் தொடர்பிலும் ஆயுதங்களுடன் துரத்தி வந்தவர்கள் தொடர்பிலும் அங்கிருந்தவர்களும் முரணான தகவல்களையே கூறுகின்றனர். யார் என்று தெரியாது என்று கூறுகின்றனர்.
 
மல்லாகம் மாவட்ட நீதிபதி அ.ஜூட்சன் சம்பவ இடத்துக்குச் சென்றார். அங்கு விசாரணைகளை மேற்கொண்டார். வீதியை மறித்துப் போராட்டம் நடத்திய மக்களுடன் பேசினார். விசாரணைகள் நடக்கும்போது வீதித் தடை ஏற்படுத்திப் போராட்டம் நடத்த வேண்டாம் என்று மக்களுக்கு அறிவுறுத்தினார்.
 
சம்பவம் நடைபெற்ற இடத்தில் இருந்து வெடிக்காத துப்பாக்கி ரவைகள் மீட்கப்பட்டன. வீதியில் கிடந்த கம்பிகள், தகரங்களை மீட்டு அந்தப் பகுதியில் மோதல் நடந்துள்ளது என்று, அவற்றைத் தடயப் பொருள்களாகப் பொலிஸார் நீதிபதியிடம் காண்பித்தனர்.
 
பொதுமக்களிடையே இருந்த சிலர் குழப்பத்தை ஏற்படுத்த முனைந்தனர். அவர்களை நீதிபதி எச்சரித்தார். சம்பவ இடத்தில் ஒளிப்படங்கள் எடுத்தவர்களைத் தடுத்த சிலர் கமராக்களை வாங்கி ஒளிப்படங்களை அழிந்ததையும் காண முடிந்தது.